الود ودي اجيلك وقت واهنآ بك ++ لكن ظروفك ووقتك كلهم ضدي
مانيب ناشد وشهي علة غيابك ++ هذي المحبة تراها بيحت سدي
غابت مشاعرك وطلة زينة اهدابك ++ مابي عيونك ابي حب(ن) على قدي
حسبي عليها نوتني شلة ركابك ++ غيري يحس بدفاك وحصتي بردي
قلي بربك بدرب الحب وش جابك ++ مالي ومال الهوى ياحلمي الوردي
مانيب انا اول ولاني اخر احبابك ++ الحب لوعة وفرقى من سنة جدي
اول غرامي اضمك واشعل ثيابك ++ واليوم لا والله اللي ماهي فيدي
اول حنيني وشفي نبرة عتابك ++ ترخي مع بالكلام ونوب(ن) تشدي
جيتك على الله بحب(ن) يمكن القابك ++ واثرك تخوفت من جزري ومن مدي
اللي جرالي قسم بالله باسبابك ++ تجرح وتخطي وتضحك ثم(ن) تصدي
ياقلب وش في يدك لو كثرة اطبابك ++ خلك جنوبي وماجا يابعدي عندي
دور على قلب لامن جيت هلابك ++ بلاش دمعة عيوني تستحل خدي
الحب صفحة وقفل بعدها كتابك ++ وان زارك الحب ماظني ابد يمدي
الحب عده مثل ماتحسب العابك ++ وتكفى ياقلبي تسلى يابعد كبدي
يكفي تفاخر بنفسك تكسب اعجابك ++ الحب ماورث الامجاد والمجدي
لاياحبيبي توقع لاتصك بابك ++ بمر بيتك بذكر ربي واعدي
قلت القصيدة وانا والله ماهابك ++ سالتني عن مزاجي وقلت لك ودي
محمد بن صياح