تخطى إلى المحتوى

يوم رحت اخطـــــــــــب الله لايرده من يوم …وش رايكم بهالشايب؟؟؟؟


مسا الخير ..إخواني ,,موضوع اليوم كله منقول …
بس هذي المقدمه البسيطه لي ..
نقلت الموضوع لسببين
الأول اهميه الموضوع ..
والثاني..اسلوب الكاتب عجبني كثير كثير ..
وبصراحه عاجبتي اكثر لهجة الكاتب …والله جميله جداً ..
ونا متأكده انكم بتقولون لي هذي لهجة اي مدينه من بلدنا الحبيب..
لأني عن جد نفسى اعرف ..هي ممكن شماليه او جنوبيه ..بس انتو حددو…
اليكم الموضوع..

اولا السلام عليكم ورحمة الله وبركاته….
ثانيا اعذروني على اسلوبي بس تراه من قلبي يعني بلا قيود في اللغه يعني بطبيعتي واعتبروها فضفضه…
ثالثا اربطوا الحزام وانطلقوا معي..
والله مدري وش اقول من الفشيله بس ابقول هالقصه لزوم العظه والعبره يعني من باب
لاعاد تعودها.. ومن باب انكم تساعدوني وترشدوني وتوجهوني وتعلموني ..مو يتهيأ لي انهم نفس المعنى؟؟؟

مالكم بالطويله سنع

هاك اليوم امي جعلي ماخلا منها قالت يا(اســــــمي)يازين اسمي بلسانها تحسسني اني سواق مصري

ماعلينا//////////

قالت باتسر ( يعني بكره…لغير الناطقين بالعربيه ) ترانا لقينا لك بنت الحلال خلاص ونلعبهم وتراها بنت ناس وطيبه وسمعتهم زينه واصلهم طيب الا ان كان به وحده في بالك ؟؟ قلت يمه وش بالي مابه احد مابه الا

خالي تركي ههههه قالت يعني تحب,,,يوه يمه اقولتس خالي تركي تقولين تحب اممممم يمه واحد حب انطحن <<<مسوي الطف جو…قالت امي ببرود افا ليه عسى ماجاه شئ قلت لا يمه ماجاه انا اللي بيجيني كملي يمه فديت اتراب رجلينتس

قالت استعد ياخلف جدي <<<دعوه للعزيزين مرررره يالبيه يايمه المهم رحت لم الحلاق وجلس يسمكر بوجهي ساعتين غير ملامحي يعني كل شئ سويته

الا المكياج طبعا والله لو يسويها هالتركي لاخليه شاورمه ..

رحنا وامي ماغير ترشرش فيني بعطر( اجنر) توها شاريته مدري تجربه فيني

مدري انها شامتن شئ انا ماااشمه
دخلنا ولا ماشاااء الله ريحة هاك الدخون اللي تشق الرااااس وهاك العصاير اللي فوق

الطاولات ولا داخلين مقهى الا ابن ماء السمااااء جاين يستقبلني انا وابوي هلالالالالالالا

ووجهة امسوي ثقيل ومبتسم ومستحي اشلون تجي مدري…
نسيت اقولكم
ابوي يقول بالسياره يا(……) اسمي مابي اقوله ههههه…ابوي يقول الله لايهينك وانت تسلم على ابو العروس ابيك تسحب ادميجته وتمخطه بووووووسه على عقاله.. قلت يايبه خله يوافق وانا ابوسلك شفايفه قال ابوي اقول استح ولا يكثر هرجك وطالع قدامك لاتدعس لك ورع همن نبلش..

ونزلنا من السياره بعد ما قضينا على العطر اللي تبخبخ علينا منه امي؟؟ حسيت انه هديه من طريقه بخها ههههههه

على فكره انا وابوي كل اشاره فاتحين هالعطر ورااشين

والمراااايه اشتكت من تعديل الشماااغ

والسؤال يبه وش رايك الشماغ تمام لين قال تراك اذيتنا بهالسؤال سق وانت ساااكت

حسيت انه فشلني بس قلت معليه يمووون ابوي عااااادي….

بس كما تدين تدااان اكيد ابوه اللي هو جدي يوم يخطبه له جننه بنفس سؤالي بس من اول مافيه سيارات مافيه الا بعارين يعني وين المرااايه اكيد باااذن البعيرمعلقينها

المهم نرجع لمحور حديثنا

وجاااي الرجال يتبوسم الا واسلم عليه وابوس الراااس بووووسه طلعت صدى

بارجاءالمكان رجال ملتحي وابيض ورزه بس استغرب يوم بسته وعرفت بسرعه سر الاستغراب اللي بسته طلع القهوجي ملبسينه غتره ورازينه عند الباب ههههههههههههه وش مدريني انا

وندخل اشوووووي الا ذاك اللي متوسطن المجلس قلت ايه هذا ابووووها ويصرخ يالله حيهم تروعت وهو يقولها حسيته يهاوش مايرحب ..وانا امسك ببشت ابوووي ويقولي فكه لاتفشلنا اقبل علينا وسلام مع ابوووي ربع سااعه واسلم عليه وابوووس راااسه حسب اشاره والدي بعينه…
ذاك اليوم فاتحها مبوووسه حسب توصيات القياده العليا ..

مع ان شكل القهوجي احلى ههههههههه امزح طبعا لايقرا موضوعي بالصدفه همن يهجينا وخاصة انه بيعرفني من هالسالفه بعد ماعرفت انه شاااعر…. وهو صاحب البيت المشهور:-
أنا الذى نظر الأعمى إلى أدبى….وأسمعت كلماتى من به صممُ

وجلس يسئلني عن شغلي ..وعن كل شئ حتى رقم فنيلتي سئل عن مقاسها امززح وابوووووي ماغير

يلفلف ارقبته بيني وبينه والله ان خفت يجيه شد عضل من هاللف…

المهم قال مالكم الا طيب الخاطر وماسمعنا عنكم الا كل طيب ونار على علم بس ابي منكم

نمهلوني اسبوع اخذ راي البنت قلنا حقك ومشينا وعيينا نتعشى لاني قبل ماروح كان اول يوم بالرجيم ههههههههههه
المهم

اتصلت عليه وقال ي(…..) البنت وافقت بس مرني ابيك بلحالك بدون ابوك.. طقني وسواس قلت ها وش يبي ذا وانواع الوساويس …

رحت له ونفس الاستديو التحليلي الاولي انواع القهوة والكيك تقل ماحركوها من يوم جيناهم

ههههههههههههههه

قال اجلس وانا عمك وانا اقول ماعمي الا اخو ابوي بقلبي طبعا ههههههههه

قال البنت وافقت وانا موافق وسمعتك تسر وماعليك خلاف ورجال شروا من عندي قلت شروا من عندك؟؟؟؟ وانا اتلفت مافيه بالمجلس الا انا وهو قلت انت تشوف احد انا

ماااشوفه

قال اسمعني لاتقاطع قلت سم وانا باااقي ادور احد مااشوف الا انا وهو قلت سكنهم مساكنهم هههه
قال:-

البنت ماعندها اي شرط الا انا عندي اشريطن اصغير قلت ابشر بعزك يابو فلان مو راضيه تطلع كلمة عمي من حلقي … مابعد يصير عمي رسمي وهالكلمه غاليه بالحيل عندي؟؟؟

قال ابيك تكتب لي شيكات بعشرة الاف ريال لمدة خمس سنوات؟

قلت ليه تبي تزوجني بنتك اقسااط؟؟؟؟

قال لا يالفطين المهر بتدفعه كااااش والعرس وكل شئ وانت تضحك ..بس البنت مدرسه وهي تعطيني راتبها كل شهر واخاف لين اعرست عليها تاخذ راتبها؟؟

قلت يابو فلان مو راااااضيه تطلع عممممممممي ابد ابد وش راتبها وش لي براتبها انا ولد ناس مايعيش على قفى حرمه؟؟

قال كفو بس لزوم الاحتياط يعني؟؟

قلت له هماها بنتك وصها تجيبلك راتبها وتفاهم معها انا مابي لها شئ والله.. ؟؟

قال هذا شرطي ههههه قلت له شرطي ولا عسكري ناظرني نظره غريبه فيما معناه (سلامات يابو الشباب تنكت وش تحس به )

قلت انا مانيب كاتبن لك شيكات ولا قالها الله وبنتك عندك وانا عند اهلي واقوم وامسك الباب.. وهو ينادي تعال … تعال قلت يارجال ماقول الا خف من ربك ترى بنتك عمرها 36 سنه اللي بسنها عندهم سبعه عيال؟؟

هذي هي الحكاااايه مع التشفير لبعض الالفاااااظ هههههههههههههههههه

اخواني خواتي..
وش رايكم بموقف هالشايب.. اللي مايخاف الله ببناته؟؟
هل راتب البنت الموظفه حق من حقوق الوالد..انا ماقول ماتعطيه تعطيه بس مايكون همه راتبها؟
هل اللي سواه معي من حقوقه؟

علموني اشلون نتزوج وابو فلان وغيره مقفلينها علينا بهالاساليب ومن كل جهه ماااقول الا الصوم ازينن

سبحان الله و الحمد لله

الوسوم:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.