إهداء للبواردي (شيخة عتيبة )

تاعد مواعيد والجاهل مكذبها واللي عرف حدها من همها سالي

إن أقبلت يوم ما تصفى مشاربها تقفي وتقبل وما دامت على حالي
في كل يوم تورينا عجايبها واليوم الأول تراه أحسن من التالي

أيام في غلبها وأيام نغلبها وأيام فيها سوا والدهر ميالي

جربت الأيام مثلي من يجربها تجريب عاقل وذاق المر والحالي

نضحك مع الناس والدنيا نلاعبها نمشي مع ألفي طوع حيث ما مالي

كم من علومٍ وكم آداب نكسبها والشعر مازون مثقالٍ بمثقالي

اعرف حروف الهجاء بالرمز واكتبها عاقل ومجنون حاوى كل الاشكالى

لكن حظي ردي والروح متعبها ما فادني حسن تأديبي مع أمثالي

إن جيت أبي حاجةٍ عزت مطالبها العفو ما واحدٍ في الناس يا والي

قومٍ إلى جيتهم رفت شواربها بالضحك وقلوبها فيها الردى كالي

وقومٍ إلى جيتها صكت حواجبها وابد ت لي البغض في مقفاي وإقبالي

ما كني مسوي إلا حال مغضبها والكل في عشرته ماكر ودجالي

يا حيف تخفى أموراً كنت حاسبها واللي على بالهم كله على بالي

الجار جافي وكم قومٍ محاربها والأهل وأصحابنا والدون والعالي

والروح وش عذرها في ترك واجبها راح الحسب والنسب في جمع الأموالي

نفسي تبى العز والحاجات تغصبها ترمي بها بين أجاويد وأنذالي

المال يحي رجالاً لا حياة ابها كالسيل يحي الهشيم الدمدم البالي

عفت المنازل وروحي يوم أجنبها منهاغنيمه وعنها البعد أولا لي

لا خير في ديرةٍ يشقى العزيز ابها يمشي مع الناس في همٍ وإذلالي

دارٍ بها الخوف دومٍ ما يغايبها والجوع فيها ومعها بعض الأحوالي

جوعى سراحينها شبعى ثعالبها الكلب والهر يقدم كل ريبالي

عز الفتى رأس ماله من مكاسبها يا مرتضي الهون لا عزٍّ ولا مالي

دللت بالروح لين أرخصت جانبها وأنا عتيبي عريب الجد والخالي

قومٍ تدوس الأفاعي مع عقاربها ولها عزايم تهد الشامخ العالي

خل المنازل وقل للبين يندبها يبكي عليها بدمع العين هطالي

لا تعمر الدار والقالات تخربها بيع الردي بالخسارة واشتر الغالي

ما ضاقت الأرض وانسدت مذاهبها فيها السعه والمراجل والتفتالِ

دارٍ بدار وجيرانٍ نقاربها وارضٍ بأرض وأطلالٍ بأطلالي

والناس اجانيب لين إنك تصاحبها تكون منهم كما قالوا بالأمثالي

الأرض لله نمشي في مناكبها والله قدر لنا أرزاق وآجالي

حث المطايا وشرِّقها وغرِّبها واقطع بها كل فجٍّ دارسٍ خالي

واطعن انحور الفيافي في ترايبها وابعد عن الهم تمسي خالي البالي

من كل عمليةٍ تقطع براكبها فدافد البيد درهامٍ وزرفالي

تبعدك عن دار قومٍ ودار تقربها واختر لنفسك للمنزال منزالي

لو مت في ديرةٍ قفرى جوانبها فيها لوطي السباع الغبس مدهالي

أخير من ديرةٍ يجفاك صاحبها كم ذا الجفا والتجافي والتعلالي

دوس المخاطر ولا تخشى عواقبها الموت واحد وبعد العز يجلالي

إن المنايا إذا مدت مخالبها تدركك لو كنت في جو السما العالي

ما قرت الأسد في عالي مراقبها تسعى على الرزق ما حنت للاشبالي

والشمس في برجها والغيم يحجبها تقفي وتقبل ولها في العرش مجدالي

رب السماوات يا محصي كواكبها يا مجري السفن في لجات الأهوالي

ضاقت بنا الأرض واشتبت شبايبها والغيث محبوس يا معبود يا والي

يا الله من مزنةٍ هبت هبايبها رعادها بات له في البحر زلزالي

ريح العوالي من المنشا تجاذبها جذب الدلى من جباء مطوية الجالي

ديمومةٍ سبلت وأرخت ذوايبها وانهل منها غزير الوبل همالي

تسقي دياراً شديد الوقت حاربها ما عاد فيها لبعض الناس منزالي

يا جاهل اسمع تماثيلاً مرتبها فيها معاني جميع القيل والقالي

مثل المحابيب زادت في قوالبها في صرفها زايده عن قرش واريالي

يا ربي توبه وروحي لا تعذبها يوم القيامه إذا ما ضاقت أعمالي

وأزكى صلاةٍ على المختار نوهبها شفيعنا يوم حشرٍ فيه الأهوالي